Müəllimlərin diaqnostik qiymətləndirilməsinə start verilib

Bakı şəhərinin ümumi təhsil müəssisələrində çalışan müəllimlərin diaqnostik qiymətləndirilməsinin keçirilməsinə start verilib.
Ana səhifə > Media > Xəbərlər
29-31 oktyabr 2015-ci il tarixlərini əhatə edən diaqnostik qiymətləndirilməyə əvvəllər sınaq imtahanlarında iştirak etməyən və iştirak edib aşağı bal toplayan, eləcə də Təhsil Nazirliyinin mərkəzləşdirilmiş qaydada keçirdiyi müsabiqələrin nəticəsi olaraq, ümumi təhsil müəssisələrinə iş yerini dəyişən və yeni işə qəbul olunan müəllimlər qatılır. Ümumilikdə, qiymətləndirilmədə 2403 nəfər müəllimin iştirak etməsi nəzərdə tutulub. İştirakçıların 2003 nəfəri Azərbaycan, 400 nəfəri rus bölməsində tədris aparan müəllimlərdir.
Kompüter vasitəsilə təşkil olunan imtahanlar zamanı müəllimlərə ixtisasları üzrə 40, təlim strategiyaları və kurikulum üzrə 20 test sualı təqdim olunur. Xatırladaq ki, hər iki blok (ixtisas, metodika) üzrə sualların ən azı 10 faizinə cavab vermiş müəllimlər diaqnostik qiymətləndirilmədən keçmiş hesab olunacaqlar.
İmtahan iştirakçılarından ibtidai sinif (860 nəfər), riyaziyyat (194 nəfər), Azərbaycan dili (181 nəfər), tarix (124 nəfər) müəllimləri sayca üstünlük təşkil edir.
Fənlər üzrə imtahan qrafiki aşağıdakı kimidir:
29.10.2015 - coğrafiya, biologiya, fiziki tərbiyə, fransız dili, GÇHR, kimya, musiqi, rus dili, ingilis dili, təsviri incəsənət, alman dili, fizika, texnologiya;
30.10.2015 - riyaziyyat, tarix, Azərbaycan dili və ədəbiyyat, ingilis dili, ibtidai sinif;
31.10.2015 - ibtidai sinif.

Quba, Qusar, Xaçmaz, Şabran, Siyəzən və Xızı rayon sakinlərinin nəzərinə!

Təhsil naziri Mikayıl Cabbarov 28 oktyabr 2015-ci il tarixində saat 11:00-da Quba şəhərindəki Heydər Əliyev Mərkəzində mərkəzi icra hakimiyyəti orqanları rəhbərlərinin 2015-ci ilin oktyabr ayında şəhər və rayonlarda vətəndaşların qəbulu cədvəlinə uyğun olaraq, Quba, Qusar, Xaçmaz, Şabran, Siyəzən və Xızı rayon sakinlərini qəbul edəcək.
Qəbula gəlmək istəyən vətəndaşlar 23, 26 və 27 oktyabr 2015-ci il tarixlərində Təhsil Nazirliyinin Telefon Məlumat Mərkəzinin 146 nömrəli telefonuna (“Qaynar xətt” xidməti) və ya http://edu.gov.az/az/contacts/request elektron poçt ünvanına müraciət edərək qeydiyyatdan keçə bilərlər.
Qeydiyyatdan keçmiş vətəndaşlardan xahiş olunur ki, qəbula gələrkən aidiyyəti məsələləri dolğun ifadə edən ərizə ilə müraciət etsinlər

Müəllimlərin bilik və bacarıqlarının diaqnostik qiymətləndirilməsi imtahanlarında test suallarının cavablandırılmasına dair təlimat

Müəllimlərin bilik və bacarıqlarının diaqnostik qiymətləndirilməsi imtahanlarında test suallarının cavablandırılmasına dair təlimat

İmtahana başlamaq üçün kompüterin ekranında görünən xanaya şəxsiyyət vəsiqəsinin seriya nömrəsi daxil edilərək “daxil ol” düyməsini sıxmaq lazımdır. Açılan pəncərədə müsabiqə məlumatları əks olunacaqdır. Məlumatların düzgünlüyünə əmin olunduğu təqdirdə, cədvəldən aşağıda “imtahana başla” düyməsini sıxdıqdan sonra imtahan başlayacaqdır. Açılan yeni pəncərənin mərkəzində imtahanın ilk sualı və cavab variantları və yuxarı sağ küncdə imtahanın başa çatmasına qalan müddət görünəcəkdir. Pəncərənin yuxarısında suallar həm mövzular, həm də sıra nömrələri üzrə görünür. Qırmızı rənglə işarələnmiş nömrə cavablandırılmamış, yaşıl rənglə işarələnmiş nömrə cavablandırılmış, sarı rənglə işarələnmiş nömrə isə hazırda ekranda görünən sualı bildirir. Həmin nömrələrdən hər hansı birinin üzərinə sıxaraq birbaşa həmin sualı ekranda göstərmək mümkündür. Bu qayda ilə istənilən sualı yenidən cavablandırmaq və ya seçilmiş cavab variantını dəyişmək mümkündür. Sualları cavablandırarkən düzgün hesab edilən cavab variantının üzərinə sıxdıqdan sonra aşağıdakı “növbəti” düyməsini sıxaraq digər suala keçilir. Daha əvvəl cavablandırılmış suallara bir daha qayıtmaq üçün əvvəlki düyməsini sıxmaq lazımdır. Qayıtdıqdan sonra seçilmiş cavab variantını dəyişmək də mümkündür. İmtahanı bitirmək üçün sonuncu – 60-cı sualı ekranda göstərərək, aşağıdakı imtahanı bitir düyməsini sıxmaq lazımdır. Düyməni sıxdıqdan sonra açılan pəncərədəki xanaya şəxsiyyət vəsiqəsinin seriya nömrəsini daxil edərək “bitir” düyməsini sıxmaq lazımdır. Həmçinin, nəzərdə tutulmuş vaxt bitdikdən sonra imtahan avtomatik olaraq bitəcəkdir. İmtahan bitdikdən sonra ekranda toplanılan bal əks olunacaqdır. İmtahan nəticəsi haqqında ətraflı məlumat şəxsi səhifədə yerləşdiriləcəkdir.

Ümumi təhsil müəssisələrində işləyən müəllimlərin bilik və bacarıqlarının diaqnostik qiymətləndirilməsinin aparılması QAYDALARI.

Azərbaycan Respublikası Təhsil Nazirliyinin   07. 10. 2015-ci il tarixli 994 nömrəli əmri ilə  təsdiq edilmişdir.

Ümumi təhsil müəssisələrində işləyən müəllimlərin bilik və bacarıqlarının diaqnostik qiymətləndirilməsinin aparılması
QAYDALARI.

1. Ümumi müddəalar.
1.1. Ümumi təhsil müəssisələrində işləyən müəllimlərin bilik və bacarıqlarının diaqnostik qiymətləndirilməsinin aparılması Qaydaları” (bundan sonra - Qaydalar) “Təhsil haqqında” Azərbaycan Respublikasının Qanununa, “Azərbaycan Respublikasında təhsilin inkişafı üzrə Dövlət Strategiyası”nın təsdiq edilməsi haqqında Azərbaycan Respublikası Prezidentinin 24.10.2013-cü il tarixli Sərəncamına, “Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında” Azərbaycan Respublikası Prezidentinin 16.01.2015-ci il tarixli 994 nömrəli Sərəncamına, “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planının təsdiq edilməsi haqqında Azərbaycan Respublikası Prezidentinin 19.01.2015-ci il tarixli Sərəncamına uyğun hazırlanmışdır. 
1.2. Bu Qaydalar Təhsil Nazirliyi sisteminə daxil olan ümumi təhsil müəssisələri, o cümlədən xüsusi tipli ümumi təhsil müəssisələrində diaqnostik qiymətləndirilmənin aparılması ilə bağlı təhsili idarəetmə orqanlarının, müəssisə rəhbərlərinin, müəllimlərin hüquq və vəzifələrini müəyyən edir. 
1.3. Diaqnostik qiymətləndirilmənin aparılması nəzərdə tutulan şəhər və rayonların siyahısı Azərbaycan Respublikası Təhsil Nazirliyinin təklifi əsasında Azərbaycan Respublikası Nazirlər Kabineti tərəfindən müəyyən edilir.

2. Diaqnostik qiymətləndirilmənin məqsədi.
2.1. müəllimlərin bilik və bacarıq səviyyəsinin test üsulu ilə müəyyənləşdirib üzə çıxarılması. 
2.2. bilik və bacarıqlarının diaqnostik qiymətləndirilməsi aparılan müəllimlərin həftəlik dərs yükü normasının optimallaşdırılmasının, aylıq vəzifə maaşlarının artırılmasının və maddi rifahının yaxşılaşdırılmasının təmin edilməsi. 
2.3. nəticələrdən asılı olaraq müəllimlərin inkişafyönümlü təlimlərə cəlb edilməsi.

3. Diaqnostik qiymətləndirilməyə cəlb olunan müəllimlər.
3.1. Diaqnostik qiymətləndirilməyə aşağıdakı kateqoriyada olan müəllimlər cəlb olunur: 
3.1.1. Təhsil Nazirliyi sisteminə daxil olan ümumi təhsil müəssisələrində (ibtidai, ümumi orta və tam orta məktəblər, ümumtəhsil internat məktəbləri və istedadlı şagirdlər üçün məktəblər, gimnaziyalar, liseylər) və xüsusi tipli ümumi təhsil müəssisələrində (xüsusi məktəblər və xüsusi internat məktəbləri, sağlamlıq imkanları məhdud uşaqlar üçün xüsusi məktəblər və internat məktəbləri, xüsusi qayğıya ehtiyacı olan uşaqlar üçün müəssisələr, cəzaçəkmə müəssisələrindəki ümumtəhsil məktəbləri) əsas iş yeri olaraq əmək müqaviləsi əsasında işləyən müəllimlər, müəllim-defektoloqlar və gənclərin çağırışaqədərki hazırlıq rəhbərləri; 
3.1.2. Nazirliyin mərkəzləşdirilmiş qaydada keçirdiyi müsabiqələrin nəticəsi olaraq ümumi təhsil müəssisələrinə iş yerini dəyişən və yeni işə qəbul olunan müəllimlər. 
3.2. İki və daha artıq fənndən tədris aparan müəllimlər öz seçimlərinə əsasən yalnız bir fənn üzrə diaqnostik qiymətləndirilmədə iştirak edə bilərlər.

4. Diaqnostik qiymətləndirilmənin keçirilməsi forması.
4.1. Diaqnostik qiymətləndirilmənin aparılması Təhsil Nazirliyi tərəfindən mərkəzləşdirilmiş qaydada proqram təminatı tətbiq olunmaqla test üsulu ilə həyata keçirilir. 
4.2. Diaqnostik qiymətləndirilmə ümumi təhsil müəssisələrinin tədris planlarında nəzərdə tutulan fənlər üzrə təşkil edilir. 
4.3. Qiymətləndirilmə zamanı iştirakçılara ixtisas üzrə ümumi təhsil proqramına uyğun 40, metodika və təlim strategiyaları üzrə ümumi olaraq 20 test tapşırığı verilir və hər bir düzgün cavab 1 balla qiymətləndirilir. 
4.4. Namizədlərə test imtahanının yerinə yetirilməsi üçün 90 dəqiqə vaxt ayrılır.

5. Diaqnostik qiymətləndirilmənin yekunları.
5.1. Diaqnostik qiymətləndirilmədə iştirak edərək test tapşırıqlarının hər bir bölmə üzrə minimum 10 faizinə düzgün cavab vermiş müəllimlər Azərbaycan Respublikası Prezidentinin 16.01.2015-ci il tarixli 994 nömrəli Sərəncamına uyğun olaraq bilik və bacarıqlarının diaqnostik qiymətləndirilməsi aparılan müəllimlər hesab olunurlar. Diaqnostik qiymətləndirilmənin nəticələri Təhsil Nazirliyinin müvafiq əmri ilə təsdiq edilir, qiymətləndirilmədə iştirak edən müəllimlərin aylıq vəzifə maaşı həftəlik dərs yükünə müvafiq olaraq artırılır. 
5.2. Təhsil müəssisələrinin rəhbərləri tərəfindən müəllimlər arasında dərs yükünün bölüşdürülməsi, onların karyera inkişafı, əməyinin rəğbətləndirilməsi zamanı diaqnostik qiymətləndirilmənin nəticələri nəzərə alınır. 
5.3. Diaqnostik qiymətləndirilmədə iştirak edərək hər bir bölmə üzrə 10 faizdən aşağı nəticə göstərmiş müəllimlər diaqnostik qiymətləndirilmədən keçmiş müəllim hesab olunmur və peşəkar ehtiyacları nəzərə alınaraq onlar üçün ixtisasartırma təlimləri təşkil olunur. 
5.4. Bilik və bacarıqlarının diaqnostik qiymətləndirilməsi aparılan müəllimlər iş yerini qiymətləndirilmə həyata keçirilməyən şəhər və rayona dəyişərlərsə, Azərbaycan Respublikası Prezidentinin 16.01.2015-ci il tarixli 994 nömrəli Sərəncamının həmin müəllimlərə şamil edilməsi aidiyyəti şəhər və rayonda qiymətləndirilmə keçirildikdən sonra həyata keçirilir. Həmin müəllimlərə təkrar olaraq qiymətləndirilmədə iştirak etmək tələb olunmur.

6. Diaqnostik qiymətləndirilmədə iştirak edənlərin hüquqları.
6.1. Təhsil Nazirliyi sisteminə daxil olan ümumi təhsil müəssisələrində əsas iş yeri olaraq əmək müqaviləsi əsasında işləyən müəllimlər, müəllim-defektoloqlar və gənclərin çağırışaqədərki hazırlıq rəhbərləri bilik və bacarıqlarının diaqnostik qiymətləndirilməsində iştirak edə bilərlər. 
6.2. Müəllimlər diaqnostik qiymətləndirilmə imtahanının yeri və vaxtı, həmçinin imtahan proqramı barədə əvvəlcədən məlumatlandırılmalıdırlar. 
6.3. Diaqnostik qiymətləndirilmə prosesinin gedişatı, sualların məzmunu və digər məsələlər ilə bağlı imtahan verən müəllimlərin müraciətlərinə qiymətləndirilmə başa çatdıqdan sonra bir həftə ərzində baxılır. Bunun üçün www.dq.edu.az saytına daxil olaraq elektron formada müraciət edilməlidir. 
6.4. Diaqnostik qiymətləndirilmədə iştirak edib zəif nəticə göstərmiş müəllimlər, nəticələrini yaxşılaşdırmaq məqsədilə qiymətləndirilmədə yenidən iştirak etmək üçün müraciət edə bilərlər.

7. Diaqnostik qiymətləndirilmədə iştirak edənlərin vəzifələri.
7.1. Müəllimlər imtahan keçiriləcək məkana nəzərdə tutulmuş vaxtda gəlməli, imtahan qaydaları ilə tanış olmalı və həmin qaydalara riayət etməlidirlər. 
7.2. Yerli təhsili idarəetmə orqanları imtahanda iştirak edəcək müəllimlər haqqında məlumatların www.dq.edu.az saytına daxil edilməsi, məlumatların dürüstlüyünün təmin edilməsi, eləcə də diaqnostik qiymətləndirilmənin məqsədinin müəllimlərə düzgün formada çatdırılması öhdəliyini daşıyırlar. 
7.3. Yerli təhsili idarəetmə orqanları və təhsil müəssisələrinin rəhbərləri müəyyənləşdirilmiş vaxtda müəllimlərin diaqnostik qiymətləndirilmədə iştirakının təmin edilməsi üçün zəruri tədbirlərin görülməsi üçün birbaşa məsuliyyət daşıyırlar.

Müəllimlərin Diaqnostik Qiymətləndirilməsi

Təhsil naziri Mikayıl Cabbarov “Müəllimlərin bilik və bacarıqlarının diaqnostik qiymətləndirilməsi tədbirlərinin davam etdirilməsi barədə” əmr imzalayıb.

Əmrə əsasən, “Ümumi təhsil müəssisələrində işləyən müəllimlərin bilik və bacarıqlarının diaqnostik qiymətləndirilməsinin aparılması qaydaları” təsdiq edilib. Eləcə də cari ilin oktyabrında Bakı şəhərinin dövlət ümumi təhsil müəssisələrində çalışan və müxtəlif səbəblərdən əvvəlki qiymətləndirmədə iştirak etməyən müəllimlərin bilik və bacarıqlarının diaqnostik qiymətləndirilməsinin keçirilməsi qərara alınıb.

2015-ci ilin noyabr-dekabr aylarında isə Gəncə, Sumqayıt, Şirvan şəhərlərinin, Abşeron, Cəlilabad, Hacıqabul, Xaçmaz, İmişli, Qubadlı, Masallı, Saatlı və Sabirabad rayonlarının dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi keçiriləcəkdir.

Müəllimlərin bilik və bacarıqlarının diaqnostikqiymətləndirilməsi tədbirlərinin davam etdirilməsi barədə Azərbaycan Respublikası təhsil nazirinin əmri

Azərbaycan Respublikası Prezidentinin 2013-cü il 24 oktyabr tarixli 13 nömrəli Sərəncamı ilə təsdiq olunmuş “Azərbaycan Respublikasında təhsilin inkişafı üzrə Dövlət Strategiyası”nda təhsilalanların fərdi xüsusiyyətlərini nəzərə alan innovativ təlim metodları və texnologiyaları vasitəsilə təhsilin məzmununun səmərəli mənimsənilməsini təmin edən yüksək nüfuzlu təhsilverənin formalaşdırılması əsas hədəflərdən biri kimi müəyyənləşdirilmişdir. Bu hədəfə nail olmaq üçün səriştə və nəticə əsaslı diferensiallaşdırılmış, əmək bazarında rəqabətqabiliyyətli əməkhaqqı və stimullaşdırma sisteminin yaradılmasını, muəllimlər arasında sağlam rəqabətin formalaşdırılmasını, müəllimlərin peşəkarlıq səviyyəsinin daim yüksəldilməsini, müəllim peşəsinin nüfuzunun artırılmasını təmin edən yeni sistemin yaradılması nəzərdə tutulmuşdur.

Bu istiqamətdə 2014-cü ildə Bakı şəhərinin dövlət ümumi təhsil müəssisələrində fəaliyyət göstərən 30 mindən çox müəllimin bilik və səriştəsinin diaqnostik qiymətləndirilməsi həyata keçirilmişdir.

Azərbaycan Respublikası Prezidentinin “Dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin dərs yükünün və əməkhaqqının artırılması haqqında” 16 yanvar 2015-ci il tarixli Sərəncamına əsasən 2015-ci il yanvarın 1-dən bilik və bacarıqlarının diaqnostik qiymətləndirilməsi aparılan müəllimlərin həftəlik dərs yükü norması 1.5 dəfə, aylıq vəzifə maaşı 2 dəfə artırılmışdır.

Diaqnostik qiymətləndirmənin nəticələrinə əsasən aşağı bal toplayan müəllimlərin ehtiyacları müəyyənləşdirilərək xüsusi təlim proqramları hazırlanmış və onların ixtisasının artırılması üzrə təlimlər təşkil edilmişdir.

Dövlət Strategiyasının icrası istiqamətində ümumi təhsil müəssisələrində işləyən müəllimlərin peşəkarlıq səviyyəsinin qiymətləndirilməsi və əlavə təlim ehtiyaclarının müəyyənləşdirilməsi, müəllimlərin dərs yükü norması və əməkhaqqının artırılması üzrə başlanmış prosesin ölkənin digər şəhər və rayonlarının ümumi təhsil müəssisələrində davam etdirilməsi məqsədilə “Azərbaycan Respublikasının Təhsil Nazirliyi haqqında Əsasnamə”nin 13.5-ci bəndini rəhbər tutaraq

ƏMR EDİRƏM:

1. “Ümumi təhsil müəssisələrində işləyən müəllimlərin bilik və bacarıqlarının diaqnostik qiymətləndirilməsinin aparılması qaydaları” (əlavə olunur) təsdiq edilsin.

2.  İnsan resursları şöbəsinə (F.Qədirov) tapşırılsın ki:

2.1. Nazirliyin aidiyyəti şöbələri və yerli təhsili idarəetmə orqanları ilə birgə diaqnostik qiymətləndirmə ilə bağlı hazırlıq işlərini və zəruri təşkilati tədbirlərin həyata keçirilməsini təmin etsin;

2.2. hər bir ixtisas üzrə sual bankının hazırlanması və ekspertizadan keçirilməsi ilə əlaqədar tədbirləri görsün;

2.3. Təhsilin inkişafı proqramları şöbəsi (E.Əmrullayev) ilə birgə diaqnostik qiymətləndirmə başa çatdıqdan sonra qiymətləndirilmənin nəticələrini təhlil etsin, müəllimlərin əmək fəaliyyətinin optimallaşdırılması üzrə təkliflər hazırlayaraq rəhbərliyə təqdim etsin. Həmçinin, diaqnostik qiymətləndirmənin nəticələrinə əsasən aşağı bal toplayan müəllimlərin ehtiyaclarını nəzərə almaqla onların ixtisasartırma üzrə təlimlərə cəlb olunmasını təşkil etsin.

2.4. Qeyri-hökümət təşkilatları və kütləvi informasiya vasitələri ilə iş sektoru (C.Valehov) ilə birgə diaqnostik qiymətləndirmənin məqsəd və mahiyyəti barədə pedaqoji heyətin məlumatlandırılmasını təmin etmək üçün kommunikasiya planının (əlavə edilir) həyata keçirilməsini təmin etsin.

3. 2015-ci ilin oktyabr ayında Bakı şəhərinin dövlət ümumi təhsil müəssisələrində çalışan və müxtəlif səbəblərdən əvvəlki qiymətləndirmədə iştirak etməyən müəllimlərin bilik və bacarıqlarının diaqnostik qiymətləndirilməsi keçirilsin.

4. Bakı Şəhəri üzrə Təhsil İdarəsi ümumi təhsil müəssisələrində işləyən, lakin müxtəlif səbəblərdən əvvəlki qiymətləndirmədə iştirak etməyən müəllimlərin ixtisaslar üzrə siyahılarının bir həftə müddətində hazırlanıb Təhsil Nazirliyinə təqdim edilməsini təmin etsin.

5. 2015-ci ilin noyabr-dekabr aylarında Gəncə, Sumqayıt, Şirvan şəhərlərinin, Abşeron, Cəlilabad, Hacıqabul, Xaçmaz, İmişli, Qubadlı, Masallı, Saatlı, Sabirabad rayonlarının dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi keçirilsin.

6. Gəncə Şəhər Təhsil İdarəsi, Sumqayıt, Şirvan şəhər, Abşeron, Cəlilabad, Hacıqabul, Xaçmaz, İmişli, Qubadlı, Masallı, Saatlı, Sabirabad rayon təhsil şöbələrinə tapşırılsın ki:

6.1. ümumi təhsil müəssisələrində işləyən müəllimlərin ixtisaslar üzrə siyahılarının hazırlanmasını və bir ay müddətində Təhsil Nazirliyinin müəllimlərin diaqnostik qiymətləndirmə ilə əlaqədar yaradılmış bazasına elektron formada daxil edilməsini təmin etsinlər;

6.2. müəllimlərin bilik və bacarıqlarının diaqnostik qiymətləndirilməsi aparılacaq məkan, hər bir məkan üzrə rəhbər və nəzarətçilər barədə Təhsil Nazirliyinə təkliflər versinlər;

6.3. müəyyənləşdirilmiş vaxtda müəllimlərin diaqnostik qiymətləndirmədə iştirakının təmin edilməsi üçün zəruri tədbirləri görsünlər;

6.4. müəllimlərin İKT bacarıqlarının inkişaf etdirilməsi üçün ümumi təhsil müəssisələrində müvafiq tədbirlərin həyata keçirilməsini təmin etsinlər.

7. İnsan resursları şöbəsi (F.Qədirov), Təhsilin inkişafı proqramları şöbəsi (E.Əmrullayev), Elm və ali təhsil şöbəsi (N.İbrahimov), Məktəbəqədər və ümumi təhsil şöbəsi (A.Əhmədov), Təhsil Problemləri İnstitutu (Q.Novruzov) qiymətləndirmənin nəticələri əsasında ümumi təhsil üzrə fənn kurikulumlarının və ixtisasartırma təhsili proqramlarının təkmilləşdirilməsi, müəllim hazırlığı proqramlarının yeniləşdirilməsi üzrə təkliflər hazırlayıb təqdim etsinlər.

8. İqtisadiyyat şöbəsi (R.Orucov) diaqnostik qiymətləndirmənin keçirilməsi ilə əlaqədar müvafiq maliyyə məsələlərinin həll olunmasını təmin etsin.

9. İnformasiya şöbəsi (E.Əliyev) əmrin “Azərbaycan müəllimi” qəzetində dərc edilməsini, aidiyyəti struktur qurum və bölmələrə çatdırılmasını və Nazirliyin veb səhifəsində yerləşdirilməsini təmin etsin.

10. Əmrin icrasına nəzarət nazir müavininə (C. Bayramov) həvalə edilsin.

                Əsas: nazir müavini C.Bayramovun xidməti məlumatı.

Mikayıl CABBAROV, 

Azərbaycan Respublikasının təhsil naziri 

7 oktyabr 2015-ci il 

№994

Müsabiqə

Təhsil naziri Mikayıl Cabbarov ““Ən yaxşı ümumtəhsil məktəbi” və “Ən yaxşı müəllim” müsabiqələrinin keçirilməsi haqqında” əmr imzalayıb.

Əmrə əsasən, “Ən yaxşı ümumtəhsil məktəbi” və “Ən yaxşı müəllim” müsabiqələrinin keçirilməsi və bu prosesin tənzimlənməsi ilə əlaqədar kollegial qərarların qəbul olunmasını təmin etmək məqsədilə Təşkilat Komitəsi yaradılıb. Həmçinin, müsabiqələrdə iştirakla bağlı Təşkilat Komitəsinə daxil olan sənədlərin müəyyən edilmiş qaydada ekspertizasını aparan işçi qrupunun tərkibi təsdiq olunub.

Qeyd edək ki, ölkə Prezidenti cənab İlham Əliyevin “Ən yaxşı ümumtəhsil məktəbi və ən yaxşı müəllim mükafatlarının təsis edilməsi haqqında” 4 sentyabr 2007-ci il tarixli sərəncamının icrası ilə əlaqədar hər il keçirilən “Ən yaxşı ümumtəhsil məktəbi” və “Ən yaxşı müəllim” müsabiqələri yaradıcı müəllimlərin və səmərəli idarəetmə fəaliyyəti ilə fərqlənən ümumtəhsil məktəblərinin aşkara çıxarılmasında mühüm rol oynayır. Müsabiqələr təhsil sahəsində sağlam rəqabəti gücləndirməklə yanaşı, tədrisin keyfiyyətinin yüksəldilməsinə də əhəmiyyətli dərəcədə müsbət təsir göstərir.